Psa 28 | MNA | STEP | Mboe ki Dabit O Yooba, nu ta tuŋ ŋonoono. Pa nu pombolmbol yo mi poroukalkaala yo. Tana iŋgi bobi tio ima ku be uulu yo. Ŋgun talŋom pa suŋŋana tio ti. Kokena tit kalŋoŋ, to aŋgaaba zin wal ta tisula len Andewa na, mi aŋla leŋ.

aMbo 63:4, 134:2

bMt 16:27; Tur 20:12+, 22:12

cKam 15:2; Mbo 18:1, 27:1

dMbo 23:1, 95:7

Psalms 28

Mboe 28

Tomtom ta isuŋ Merere be ipokot mbulu kizin wal sananŋan

Mboe ki Dabit

1 O Yooba, nu ta tuŋ ŋonoono. Pa nu pombolmbol yo mi poroukalkaala yo.
Tana iŋgi bobi tio ima ku be uulu yo.
Ŋgun talŋom pa suŋŋana tio ti.
Kokena tit kalŋoŋ,
to aŋgaaba zin wal ta tisula len Andewa na, mi aŋla leŋ.
2 Iŋgi aŋsara nomoŋ ima urum ku leleene ta potomŋana kat na,
mi aŋtaŋroro u be uulu yo.
Leŋ tiŋiizi tio ti mi muŋai yo. Pa nio mbesooŋo ku tau. ^a

3 Zin wal sananŋan ta tiute u som
mi tinok sanaana kamŋana na,
ziiri yo raama zin pepe. Kokena niamŋan amla leyam.
Wal tana kwon na, izzo sua pizin tomtom kembei lelen be ziŋan tiparlup zin ma tiwe tamen.
Tamen lelen na, iurur be tipasaana zin.
4 Pokot mbulu sananŋana ta tikamam na.
Pa naman imbel sanaana kamŋana kek.
Tana ur kadoono pizin mi pokot mbulu kizin. ^b
5 Pa uraata bibip ki Yooba mi nama muriini na,
tikam ŋgar pa risa som.
Tana ni ko ipambiriizi zin ma timap kat.
Ko irao timaŋga mini na som.
6 Nio aŋpakur Yooba zaana!
Pa nio aŋtaŋroro i be imuŋai yo, mi ni ileŋ tiŋiizi tio kek.
7 Nio aŋkamam mburoŋ se ki Yooba tau. Mi ni iwe siŋgiao pio.
Nio aŋpase pini, mi ni iuluulu yo.
Tana leleŋ ambai kat, mi aŋbo mboe.
Ko aŋpakurkur zaana ma isala kor.

8 Yooba wal kini tikamam mburan se kini.
Mi ni iwe kembei siiri mbolŋana pa king ta itunu iroogi mi iuri pa uraata na mi iuluuli. ^c

9 Yooba, kamke wal ku mi kampe zin. Pa zin na, koroŋ ku ŋonoono.
Motom pizin sipsip ku mi mboro zin ta buri, mi iseeŋge iseeŋge ma ila. ^d